శ్రీ రుద్రం 6వ అనువాకం
నమో” జ్యేష్ఠాయ’ చ కనిష్ఠాయ’ చ
అందఱికంటే జ్యేష్ఠుడు, అందరిలోకీ చిన్నవాడు అయినవానికి నమస్కారము.
నమః’ పూర్వజాయ’ చాపరజాయ’ చ
అన్నింటికంటే ముదు జన్మించినవానికి, జగత్తునందలి అన్నింటి తరువాత జన్మించినవానికి నమస్కారము.
నమో’ మధ్యమాయ’ చాపగల్భాయ’ చ
మధ్యలో జన్మించినవానికి, ఇంద్రియ పటుత్వము అధికముగాలేని బాలురరూపమున ఉద్భవించినవానికి నమస్కారము.
నమో’ జఘన్యా’య చ బుధ్ని’యాయ చ
తొడల మధ్యనుండి జన్మించినవానికి, (వృక్షాదుల) మూలములనుండి జన్మించినవానికి నమస్కారము.
నమః’ సోభ్యా’య చ ప్రతిసర్యా’య చ
పుణ్య పాపములు రెండింటితోనూ కూడియున్నవానికి, (వివాహాది శుభకార్యములందు) రక్షాబంధనమును ధరించువానికి నమస్కారము.
నమో యామ్యా’య చ క్షేమ్యా’య చ
యమునియొక్క లోకములుగా ప్రకటమైనవానికి, క్షేమకరములైనవాటియందు ఉన్నవానికి నమస్కారము.
నమ’ ఉర్వర్యా’య చ ఖల్యా’య చ
సర్వ సస్యములతో నిండిన భూములయందు ఉన్నవానికి, పంటలనుండి ధాన్యములను రాబట్టు (వేరుచేయు) ప్రదేశములందు ఉన్నవానికి నమస్కారము.
నమః శ్లోక్యా’య చాஉవసాన్యా’య చ
వేదములచే స్తుతింపబడుచున్నవానికి, ఉపనిషత్తులయొక్క సారమైనవానికి నమస్కారము.
నమో వన్యా’య చ కక్ష్యా’య చ
వనములలో వృక్షాదులయందు ఉన్నవానికి, లతాదులయందు ఉన్నవానికి నమస్కారము.
నమః’ శ్రవాయ’ చ ప్రతిశ్రవాయ’ చ
శబ్ద స్వరూపుడుగా ఉన్నవానికి, ఆ శబ్దముయొక్క ప్రతిధ్వని రూపుడుగా ఉన్నవానికి నమస్కారము.
నమ’ ఆశుషే’ణాయ చాశుర’థాయ చ
వేగముగా పోవుచున్న సేనలయందు ఉన్నవానికి, వేగముగా పోవుచున్న రథములయందు ఉన్నవానికి నమస్కారము.
నమః శూరా’య చావభిన్దతే చ
శూరుడైనవానికి, శత్రుసేనలను సంహరించువానికి నమస్కారము.
నమో’ వర్మిణే’ చ వరూధినే’ చ
కవచమును కల్గియుండినవానికి, మంచి గృహమును కల్గియుండినవానికి నమస్కారము.
నమో’ బిల్మినే’ చ కవచినే’ చ
శిరోరక్షకమగు కిరీటమును ధరించినవానికి, శరీరరక్షకమగు కవచమును ధరించినవానికి నమస్కారము.
నమః’ శ్రుతాయ’ చ శ్రుతసే’నాయ చ
వేద ప్రసిద్ధుడైనవానికి, ప్రసిద్ధమైన సేనలు కలవానికి నమస్కారము.
No comments:
Post a Comment