శ్రీ రుద్రం 11వ అనువాకం

శ్రీ రుద్రం 11వ అనువాకం

సహస్రా’ణి సహస్రశో యే రుద్రా అధి భూమ్యా”మ్ |

తేషాగ్‍మ్’ సహస్రయోజనే‌உవధన్వా’ని తన్మసి |

(ఓ రుద్రా!) వేలకొలది సంఖ్యలో, వేలాది రకములైన రుద్రులు ఎవరైతే ఈ భూమండలముపై ఉన్నారో, ఆ రుద్రులయొక్క ధనస్సులకుగల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.

అస్మిన్-మ’హత్-య’ర్ణవే”‌உన్తరి’క్షే భవా అధి’ |

ఈ మహా సముద్రములయందు, అంతరిక్షమునందు (గల అసంఖ్యాక రుద్రులయొక్క ధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము).

నీల’గ్రీవాః శితికణ్ఠా”ః శర్వా అధః, క్ష’మాచరాః |

కంఠమునందు కొంతభాగము నీలిరంగులోనుండి, మిగిలిన భాగమంతయూ తెల్లని రంగులోనుండి, పాతాళమునందున్న (అసంఖ్యాక రుద్రులయొక్క ధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.)

నీల’గ్రీవాః శితికణ్ఠా దివగ్‍మ్’ రుద్రా ఉప’శ్రితాః |

కంఠమునందు కొంతభాగము నీలిరంగులోనుండి, మిగిలిన భాగమంతయూ తెల్లని రంగులోనుండి,  స్వర్గమునందున్న (అసంఖ్యాక రుద్రులయొక్క ధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.)

యే వృక్షేషు’ సస్పిఞ్జ’రా నీల’గ్రీవా విలో’హితాః |

వృక్షములమీద లేతగడ్డి రంగులోనూ, నీల వర్ణములోనూ, రక్త వర్ణములోనూ ప్రకాసించుచున్న (అసంఖ్యాక రుద్రులయొక్క ధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.)

యే భూతానామ్-అధి’పతయో విశిఖాసః’ కపర్ది’నః |

సకల భూతములకు అధిపతులుగానూ, నున్నగా చేయబడిన శిరస్సులు కలవారుగానూ, జటాజూటములు గలవారుగానూ  ఉన్న (అసంఖ్యాక రుద్రులయొక్క ధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.)

యే అన్నే’షు వివిధ్య’న్తి పాత్రే’షు పిబ’తో జనాన్’ |

అన్నము మొదలగు భక్ష్యములందును, పానీయములయందును ఉండి, వాటిని భుజించువారిని, త్రాగువారిని బాధించుచున్న (అసంఖ్యాక రుద్రులయొక్క ధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.)

యే పథాం ప’థిరక్ష’య ఐలబృదా’ యవ్యుధః’ |

ఏ రుద్రులు (లౌకికములును, వైదికములను అగు) మార్గములను రక్షించుచున్నారో, ఏ రుద్రులు అన్న ప్రదానముచే జీవులను పోషించుచున్నారో, ఏ రుద్రులు శత్రువులతో యుద్ధముచేసి వారిని తరిమివేయుచున్నారో, (ఆ అసంఖ్యాక రుద్రులయొక్క ధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.)

యే తీర్థాని’ ప్రచర’న్తి సృకావ’న్తో నిషఙ్గిణః’ |

ఏ రుద్రులు తీర్థ క్షేత్రములందు (జనులను పీడించుటకై) కత్తులు ఈటెలు మొదలగు ఆయుధములను చేత ధరించి సంచరిస్తున్నారో (ఆ అసంఖ్యాక రుద్రులయొక్క ధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.)

య ఏతావ’న్తశ్చ భూయాగ్‍మ్’సశ్చ దిశో’ రుద్రా వి’తస్థిరే |

తేషాగ్‍మ్’ సహస్రయోజనే‌உవధన్వా’ని తన్మసి |

ఇప్పటివరకు ప్రస్తావించిన రుద్రులు మాత్రమేగాక, ఇంకా ఏ రుద్రులు అన్ని దిక్కులయందును ఉన్నారో, వారందరియొక్కధనస్సుల వింటిత్రాడులను తొలగించి, ఆ ధనస్సులను మానుండి వేలకొలది యోజనముల దూరములో ఉంచుము.

నమో’ రుధ్రేభ్యో యే పృ’థివ్యాం యే”‌உన్తరి’క్షే

యే దివి యేషామన్నం వాతో’ వర్-షమిష’వ 

స్-తేభ్యో దశ ప్రాచీర్దశ’ దక్షిణా దశ’ ప్రతీచీ

ర్-దశో-దీ’చీర్-దశోర్ధ్వాస్-తేభ్యో నమస్తే నో’ మృడయన్తు 

తే యం ద్విష్మో యశ్చ’ నో ద్వేష్టి తం వో జమ్భే’ దధామి

ఏ రుద్రులు ఈ భూమిపై ఉండి అన్నమును తమ బాణములుగా కలిగియున్నరో, ఏ రుద్రులు ఆకాశమునందు ఉండి వాయువును తమ బాణములుగా కలిగియున్నారో, ఏ రుద్రులు స్వర్గమునందు ఉండి వర్షమును తమ బాణములుగా కలిగియున్నారో, ఆ రుద్రులందరికీ నమస్కారము. తూర్పు ముఖముగా - పది వేళ్ళ చివరలుగల అంజలలుతోడనూ (అనగా రెండు చేతులూ జోడించి), దక్షిణ ముఖముగా - పది వేళ్ళ చివరలుగల అంజలలుతోడనూ, పడమటి ముఖముగా - పది వేళ్ళ చివరలుగల అంజలలుతోడనూ, ఉత్తర ముఖముగా - పది వేళ్ళ చివరలుగల అంజలలుతోడనూ, ఊర్ధ్వ ముఖముగా - పది వేళ్ళ చివరలుగల అంజలలుతోడనూ, ఆ రుద్రులకు నమస్కారము. ఆ రుద్రులందరూ మమ్ములను సుఖపఱచుదురుగాక. మేము ఎవరిని ద్వేషింతుమో, మరియు మమ్ములను ఎవరు ద్వేషింతురో ఆ శత్రుద్వయమును, (ఓ రుద్రులారా) మీ తెఱచియున్న నోటిలో ఉంచుచున్నాము.

త్ర్యం’బకం యజామహే సుగన్ధిం పు’ష్టివర్ధ’నమ్ |

ఉర్వారుకమి’వ బన్ధ’నాన్-మృత్యో’ర్-ముక్షీయ మా‌உమృతా”త్ |

త్రినేత్రుడు, సుగంధములను వెదజల్లువాడు మరియు పరిపుష్టిని కల్గించుచువానిని (మేము) ఆరాధించెదము. (దోసతీగ తొడిమనుండి) బాగా ముగ్గిన దోసపండు విడివడు రీతిన మమ్ములను మృత్యువుయొక్క బంధనములనుండి విడిపించుము. అట్లే అమృతత్వమునుండి (ఆత్మ స్థితినుండి) మేము విడివడకుందుముగాక.

యో రుద్రో అగ్నౌ యో అప్సు య ఓష’ధీషు యో రుద్రో విశ్వా భువ’నా వివేశ తస్మై’ రుద్రాయ నమో’ అస్తు |

ఏ రుద్రుడు అగ్నియందున్నాడో, ఏ రుద్రుడు జలమునందున్నాడో, ఏ రుద్రుడు ఓషధులయందున్నాడో, ఏ రుద్రుడు సకల భువనములయందు వ్యాపించియున్నాడో, అట్టి రుద్రునకు నమస్కారము.

తము’ ష్టుహి యః స్విషుః సుధన్వా యో విశ్వ’స్య క్షయ’తి భేషజస్య’ |
యక్ష్వా”మహే సౌ”మనసాయ’ రుద్రం నమో”భిర్-దేవమసు’రం దువస్య |

ధృఢమైన ధనస్సును, శక్తివంతమైన బాణములను ధరించి భవరోగములను నశింపజేయు ఔషధమైయున్నవానిని స్తుతించుము. దైవము మరియు కష్టములను నశింపజేయువాడగు రుద్రుని ప్రశాంతమైన మనస్సు కొఱకై నమస్సులతో మేము పూజించుచున్నాము.

అయం మే హస్తో భగ’వానయం మే భగ’వత్తరః |
అయం మే” విశ్వభే”షజో‌உయగ్‍మ్ శివాభి’మర్శనః |

శివపూజయందు శివలింగమును తాకుటచే ఈ నా హస్తము అత్యంత దివ్యమైనదిగా అగుగాక. అట్లు శివుని తాకుటచే, నా హస్తము ఈ విశ్వమునందలి సకలరోగములపాలిట ఔషధమగుగాక.

యే తే’ సహస్ర’మయుతం పాశా మృత్యో మర్త్యా’య హన్త’వే |

తాన్ యఙ్ఞస్య’ మాయయా సర్వానవ’ యజామహే |

జీవులను నాశనమునకు కారణమైన వేలాది బంధనములన్నింటినీ శక్తిద్వారా నశింపజేయుము. అందులకై ఈ యజ్ఞము (అగ్నిహోత్రము) ద్వారా మేము మిమ్ములను పూజించున్నాము.

మృత్యవే స్వాహా’ మృత్యవే స్వాహా” |

ఈ హవిస్సు (మృత్యువు పాలిటి) మృత్యువైన రుద్రుని చేరుగాక. ఈ హవిస్సు రుద్రుని చేరుగాక.

ఓం నమో భగవతే రుద్రాయ విష్ణవే మృత్యు’ర్మే పాహి ||

సర్వవ్యాపియైన భగవానుడగు రుద్రునకు నమస్కారము. నన్ను మృత్యువునుండి రక్షించుము.

ప్రాణానాం గ్రన్థిరసి రుద్రో మా’ విశాన్తకః |

తేనాన్నేనా”ప్యాయస్వ |
నీవు మాలోని ప్రాణచలనమనెడి పగ్గములను పట్టి నడిపించున్నావు. ఓ రుద్రా! దయతో మృత్యువును మానుండి దూరముచేయుము. నేను అర్పించు ఈ ఆహారమును స్వీకరించి మాయందు పరిపూర్ణముగా ప్రకాశించుము.
 

ఓం శాంతిః శాంతిః శాన్తిః’